វ៉ាស៉ីនតោន ៖ រដ្ឋបាលលោក ចូ ប៊ីដិន កាលពីថ្ងៃសុក្របានប្រកាសថា សហរដ្ឋអាមេរិចនឹងរឹតត្បិតការធ្វើដំណើរពីប្រទេសឥណ្ឌា ខណៈពេលដែលការប្រកាសផ្តល់ជំនួយសង្គ្រោះលើកដំបូងរបស់សហរដ្ឋអាមេរិកនឹងទៅដល់ប្រទេសឥណ្ឌាឆាប់ៗ ដើម្បីជួយប្រទេសនេះដោះស្រាយវិបត្តិដែលកំពុងរីករាលដាលនៃវីរ៉ុសកូវីដ-១៩។ នេះបើតាមការដកស្រង់ពីការចេញផ្សាយរបស់សារព័ត៌មាន ABC NEWS ចុះថ្ងៃទី១ ខែឧសភាឆ្នាំ២០២១នេះ។

សេចក្តីថ្លែងការណ៍កាលពីថ្ងៃសុក្របាននិយាយថាការរឹតត្បិតការធ្វើដំណើរពីប្រទេសឥណ្ឌានឹងចូលជាធរមាននៅថ្ងៃអង្គារទី ៤ ខែឧសភា។

គោលការណ៍ការរឹតត្បិតការធ្វើដំណើរពីប្រទេសឥណ្ឌានេះត្រូវបានប្រកាសក្នុងថ្ងៃតែមួយ នៃការប្រកាសផ្តល់ជំនួយដំបូងរបស់អាមេរិកទៅកាន់ទីក្រុងញូវដេលីតាមយន្ដហោះដឹកទំនិញធុន C-17 របស់កងទ័ពអាកាសអាមេរិក។ ឧបករណ៍ធ្វើរោគវិនិច្ឆ័យយ៉ាងរហ័ស (rapid diagnostic tests ) ចំនួន១៨៤.០០០គ្រឿង និងឧបករណ៍N95s ប្រមាណ ៨៤,០០០ រួមជាមួយអុកស៊ីសែនចំនួន ១១០០ស៊ីឡាំង ដែលអាចនឹងត្រូវបានបំពេញបន្ថែមសម្រាប់ម៉ាស៊ីនអុកស៊ីសែនចំនួន ១៧០០ទៀត និងឧបករណ៍ជំនួយផ្សេងទៀតជាច្រើននឹងទៅដល់ប្រទេសឥណ្ឌាដើម្បីបំពេញតំរូវការចាំបាច់។

ថ្នាំចំនួន ២០,០០០ដូសដែលជាប្រភេទថ្នាំប្រឆាំងវីរុស ដែលបានបង្ហាញថាមានប្រសិទ្ធភាពក្នុងការព្យាបាលប្រឆាំងកូវីដ-១៩ ក៏នឹងត្រូវបានសហរដ្ឋអាមេរិកបញ្ជូនទៅ ស្របពេលដែលប្រទេសឥណ្ឌាទទួចស្នើសុំជំនួយសង្គ្រោះបន្ទាន់ជាអាទិភាព រួមមានម៉ាស៊ីនអុកស៊ីសែននិងបំពង់ខ្យល់ការព្យាបាល និង PPE ក៏ដូចជាឧបករណ៍ធ្វើតេស្តរកមេរោគទៀតផង។

សហរដ្ឋអាមេរិកបានប្រកាសជាលើកដំបូងថា ខ្លួននឹងបញ្ជូនការផ្គត់ផ្គង់ទៅប្រទេសឥណ្ឌានៅថ្ងៃអាទិត្យនេះ ខណៈដែលស្ថានភាពកូវីដ-១៩ក្នុងប្រទេសនោះកាន់តែអាក្រក់ទៅៗ។ តាមរបាយការណ៍របស់ Worlddometer បានឱ្យដឹងថាប្រជាជនឥណ្ឌាចំនួន ១៩ ១៦៤ ៩៦៩នាក់បានឆ្លងកូវីដ-១៩ ហើយការស្លាប់បានកើនដល់ ២១១ ៨៥៣នាក់។ 

បន្ថែមលើការផ្តល់ជំនួយសង្គ្រោះបន្ទាន់ ក្រសួងការបរទេសសហរដ្ឋអាមេរិចបានអនុម័តទទួលយកការស្ម័គ្រចិត្តនៃការវិលត្រឡប់របស់ក្រុមគ្រួសារនៃមន្ត្រីការទូតសហរដ្ឋអាមេរិកមកពីប្រទេសឥណ្ឌា ដែលក្រុមគ្រួសារអាចធ្វើដំណើរតាមជើងហោះពាណិជ្ជកម្មបាន។ ករណីនេះអាចឡើងប្រសិនបើស្ថានភាពកាន់តែធ្ងន់ធ្ងរ។

អ្នកនាំពាក្យក្រសួងការបរទេសលោក Ned Price បានអំពាវនាវឲ្យវិស័យឯកជនគាំទ្រដល់កិច្ចខិតខំប្រឹងប្រែងថ្មីរបស់រដ្ឋាភិបាលសហរដ្ឋអាមេរិក ហើយបាននិយាយថា គោលដៅរបស់អាមេរិកគឺគ្រាន់តែចង់បានការជួយ “ ដាក់ឱ្យប្រើប្រាស់ភ្លាមៗនិងមានប្រសិទ្ធភាព” ប៉ុន្តែបានបដិសេធមិនថ្លឹងថ្លែងថាតើគួរចែកចាយយ៉ាងដូចម្តេច៕